Sunnfjord Folkehøgskule » Fotografi

Fotoklassen til Runde

Arne Håberg — Mon, 26 Apr 2010 17:44:39 +0000

Sherry opplever norsk natur på nært hald. Foto: Arne Håberg.

Sist veke var fotoklassen på den årlege turen til fugleøya Runde på Sunnmøre. Ver, vind og temperatur er vanskeleg å ha med å gjere i april, men denne gongen klaffa absolutt alt. Vi kom for å sjå lundefugl, og vi fekk rikeleg. Vi kom for å få båttur til fuglefjellet, og vi fekk ein av tidenes vakraste båtturar. Mellom anna såg vi mange ørner, og endåtil kval! No står det att å lage årets siste fotoutstilling som vil henge til alle har reist heim.

Ørn i solnedgang. Foto: Arne Håberg.

Ballongtur i Egypt

Arne Håberg — Wed, 17 Mar 2010 14:00:11 +0000

Fotografiklassen var på tur til Egypt, mellom mange stader var vi i Luxor. Eitt av tilboda der er å vere med på tur i varmluftsballong. Dei er mellom dei største i verda og kan ta over 20 personar i korga. Dei kan berre lette når lufta er kjøleg, difor måtte vi stå opp før klokka fem. Men det var verd det! God tur!

Winter palace

Øyvind Høstaker — Sun, 14 Feb 2010 17:34:54 +0000

Det er 30 grader og sol i Luxor! Vi har det fint og lærer masse kvar dag. I går var det Kongenes dal. I dag er det Karnak tempelet. Seile litt på Nilen og middag på Winter Palace Hotel. Vi har det strålande i Egypt.

Topp stemning i Egypt

Øyvind Høstaker — Fri, 12 Feb 2010 08:24:03 +0000

Fotogjengen er innom Kairo etter ei spennande reise i ørkenen. I går var alle til middag heime hos våre egyptisk
venner. I dag ventar ei togreise til Luxor. Stemninga er på topp trass i eit par småkranglete magesekkar.

SMS frå Fotografi 8.februar

Øyvind Høstaker — Mon, 08 Feb 2010 09:48:18 +0000

SMS fredag 5. februar

Vi er trygt på plass i Kairo. I dag står pyramidane på programmet. Gruppa er veldig klar for å oppleve masse i dette spennande landet. Halvard

SMS måndag 8.februar

Endeleg er fotoklassen komne fram til oasen Siwa i Egypt etter 13 timar i buss gjennom ørkenen. Snart skal vi rundt byen på eselkjerre! Før det rekk vi å slappe av ei stund ved bassenget under palmene. Arne

- Aldri orka ein heil foredragstime før i dag!

Arne Håberg — Fri, 15 Jan 2010 13:48:05 +0000

Media var til stades. Her NRK ved Birger Meland i samtale med Morten Krogvold. Foto: Arne Håberg.

Det var uvanleg intens konsentrasjon i auditoriet under Morten Krogvold sitt foredrag. Sjølv dei som har dårleg tradisjon for å halde ein heil skuletime, hang framleis med etter 120 minuttar. Det handla ikkje så mykje om bilete som mange hadde forventa, men i staden om å ta ansvar for sitt eige liv. Krogvold utfordra til å slutte å fyllle hovudet sitt med søppel og i staden finne gode alternativ i litteratur, film og andre kunstformer, og på meisterleg vis sette han dette i samanheng med sin eigen situasjon som fotograf. Ved hjelp av smittande engasjement og gode forteljingar nagla han eit fullt auditorium fast i stolane. Både lokalpressa og NRK Sogn og fjordane fann interesse i at ein så høgt profilert fagmann brukte ein heil dag på billedinteresserte ungdommar. Temadagen var eit resultat av samarbeid mellom Mo og Jølster vidaregåande, Firda vidaregåande, Sogndal vidaregåande, Sogn og Fjordane Kunstmuseum og Sunnfjord Folkehøgskule.

Morten Krogvold

Arne Håberg — Wed, 06 Jan 2010 12:31:39 +0000

Medialinjene på fleire vidaregåande skular i Sogn og fjordane saman med Sogn og Fjordane Kunstmuseum arrangerer 14.januar eit dagsseminar med fotografen Morten Krogvold. Seminaret blir på Sunnfjord Folkehøgskule og Fotografi-linja vår blir ein del av vertskapet.

Morten Krogvold er kjend for å kunne inspirere ein gråstein. Foto: Arne Håberg.